Keina Swart: Party drome moet 25 jaar gelos word totdat hulle eendag self huis toe kom

by Protea Boekhuis on Mar 31st, 2015

Keina Swart het onlangs ‘n rubriek geskryf vir Netwerk24 oor drome wat soms gelos moet word om self terug te kom na jou toe.

Die Bloujaar-outeur het hierdie maand haar jongste versameling rubrieke, Die potlooddief se bruid en ander stories, by Protea Boekwinkel in Pretoria bekendgestel.

Swart onthou die blou bakkie waarmee sy en haar man so lekker gery het in hul studentedae, die smart toe hulle dit op die plaas moes agterlaat en die vreugde toe hulle 25 jaar later weer agter die stuur kon inskuif.

Lees die artikel:

Dit was warm, die vensters was oop; my hare los en oral in my gesig. Soos destyds. “Kan jy dit glo, hê? Kan jy dit wragtag glo?” het hy in die wind vir my geskree. En toe die Waterberge soos ’n ou, ou kaart voor ons oopvou en sy hand weer op my knie kom lê, het ek opeens gesukkel om die pad voor my gesien te kry.

Want, sien, soms moet jy glad nie maak soos begeesterde motiveringsprekers jou so graag wil oortuig nie. Party drome moenie gejaag of gehaal of gegryp word nie. Hulle moet 25 jaar gelos word totdat hulle eendag self huis toe kom.